Отворен Кариерен Ден во СОУ „Кочо Рацин“ – Свети Николе

Во организација на СОУ „Кочо Рацин“ – Свети Николе, на 2 јуни 2026 година се одржа „Отворен кариерен ден“, настан посветен на професионалната ориентација на младите и нивното запознавање со можностите за образование, практична работа и вработување.

Настанот се реализираше во просториите на училиштето и собра претставници од компании, ученици, родители и наставен кадар, создавајќи простор за директна комуникација помеѓу образовниот и бизнис секторот.

Под мотото „Иднината започнува сега“, учесниците имаа можност да се информираат за различни професии, потребите на локалниот пазар на труд и можностите што ги нудат компаниите за кариерен развој и професионално усовршување.

Настанот беше наменет за учениците од деветто одделение, нивните родители и сегашните ученици, со цел да им помогне во донесувањето информирани одлуки за нивната идна образовна и професионална насока.

Тимот на МИК Свети Николе со задоволство учествуваше на овој значаен настан и имаше можност да ја претстави компанијата пред младите генерации. Преку непосредна комуникација со учениците и посетителите, нашите претставници ги запознаа присутните со историјата на компанијата, производствените процеси, вредностите на МИК Свети Николе, како и можностите за професионален развој во современа производствена средина.

Во рамки на настанот беа организирани штандови и панел-дискусија, каде што компаниите имаа можност да ги споделат своите искуства и да дадат корисни насоки за младите кои се наоѓаат пред важни одлуки поврзани со нивната иднина. Ваквите иницијативи имаат особено значење бидејќи придонесуваат за градење посилна врска помеѓу образованието и реалниот сектор.

Како општествено одговорна компанија, МИК Свети Николе останува посветена на поддршка на младите и нивниот професионален развој. Веруваме дека вложувањето во новите генерации е инвестиција во иднината на заедницата и економијата, а учеството на вакви настани претставува одлична можност за поттикнување на амбицијата, знаењето и претприемачкиот дух кај младите луѓе.